THIRUPPATHI PERUMAL- திருப்பதிப் பெருமாள்: பஜனைமடத்தெரு

கோயில் வரலாறு

இக்கோயில் திருப்பதித் தலத்தில் இருந்து கொண்டு வரப்பெற்ற பிடி மண்ணை அடிப்படையாக வைத்துக் கட்டப் பெற்றதாகும். ஒரு காலத்தில் முத்துக் கருப்ப முகுந்தர் என்பவர் அழகன் குளத்தில் வசித்து வந்தார். இவருக்கு ஆண்டுதோறும் திருப்பதி சென்றுத் தரிசிப்பது வழக்கம். இவரின் முதிய வயதில் இப்பிரார்த்தனை செய்ய இயலாது போனது. எனவே இவர் திருப்பதி பெருமாளைத் தரிசிக்க இயலவில்லையே எனக் கவலைப்பட்டார். அப்போது இவரின் கவலையைப் போக்கும் வண்ணமாக திருப்பதிப் பெருமாள் கனவில் தோன்றி "நானே அழகன் குளத்திற்கு உன்னைக் காண வருகிறேன். நீ வரவேண்டாம். என் திருப்பதியில் இருந்துப் பிடிமண் எடுத்துச் சென்று அழகன் குளத்தில் வைத்து வழிபடு'' என்றார். அவ்வடிப்படையில் தோன்றியதுதான் இக்கோயில்

கோயில் நிர்வாகம்

இக்கோயிலின் நிர்வாகத்தைப் பெரியவர் அமரர் நா. பத்மநாபன் செய்து வந்தார். இவர் தீவிர கண்ணன் பக்தர். இவர் இக்கோயிலின் திருப்பணிகளில் கவனம் செலுத்தினார். அவ்வாறு கவனத்துடன் செய்து வந்த இப்பணி நிறைவடையும் தருவாயில் இவரும் கண்ணன் பாதம் சேர்ந்தார். இவரைத் தொடர்ந்து இவரின் குடும்பத்தினர் திரு. ஆ. ம ஸ்ரீதரன்திருமதி வாசுகி திரு. நா. கோ. தெய்வப்பிரகாசம்திருமதி கிருஷ்ணை திரு. நா. ப. அசோகன் திருமதி மணிமேகலை திரு. நா. பிரகலாதன் திருமதி. சுமுகி ஆகியோர் நிர்வகித்து வருகின்றனர்

கோயிலின் சிறப்புகள்

இக்கோயிலில் உள்ள சந்தான கோபால கிருஷ்ணரை வழிபட்டால் புத்திரப்பேறு இல்லாதவர்க்குப் புத்திரப்பேறு கிட்டும். நோயற்ற வாழ்வு நிலைக்கும்.தொழிலில் மேன்மை ஓங்கும்.கருட தரிசனம் கண்டால் கல்வி பெருகும்.செல்வம் பெருகும்.

முக்கியமான சிறப்பு

இங்குள்ள சந்தான கோபால கிருஷ்ணரை வணங்கினால் திருப்பதிப் பெருமாளை வணங்கியதற்குச் சமமாகும், திருப்பதி பெருமாளை எண்ணி இக்கோயிலில் செய்யப்படும் அனைத்தும் திருப்பதிப் பெருமாளுக்குச் செய்தனவே ஆகும்.

இக்கோயிலில் உள்ள சன்னதிகள்

திங்கள், 13 ஏப்ரல், 2009

பஜனைமடத்தெரு

யாதவர்கள் அதிகம் வசிக்கும் பஜனைமடத்தெரு, அழகன்குளத்தின் மூத்த பூர்வீகக் குடிகள் வசிக்கும் பகுதியாகும். ஆரம்ப காலத்தில் ஊரின் வடக்குப் பக்கத்தில் வசித்த அவர்கள், பிற்காலத்தில் விவசாயம் செய்வதற்கு வசதியாக அழகன்குளத்தின் தென்பகுதிக்கு குடியேறினார்கள். அது மட்டுமல்லாது நிலங்களையும் மிகக் குறைந்த விலைக்கு விற்றுவிட்டு இடம் பெயர்ந்தனர்.

இன்றும் அழகன்குளத்தின் விவசாயக்க் குடிமக்கள் இருப்பது பஜனைமடத்தெருவில்தான். மார்கழி மாதம் முப்பது நாளும் கண்ணன் கோவிலிலிருந்து பஜனை பாடிச் சென்று பாவை நோன்பு நோட்பவர்கள் வசிக்கும் பகுதியாகையால் அது பஜனைமடம் என்று அழைக்கப்பட்டது.

இன்று அந்த அளவிற்கு கூடுதல் சதவீதத்தினர் கலந்து கொள்ளவில்லையென்றாலும் சிறுவர் சிறுமியர் மார்கழி மாதத்தில் பஜனை பாடி ஊரைச் சுற்றி பிற கோவில்களுக்கும் சென்றுவருகின்றனர்.